مش هاكل زبادي تاني .

مش هاكل زبادي تاني .
قلتها واتنطتطت في الشقة لما المدفع ضرب النهارده .
مممممم
قلة أدب مش كده ؟
آي والله قلة أدب انك تقول لرمضان كده وهو ماشي ..
معلش يا أبو صيام ..بس هي تلاكيك الأهالي .
قال يعني احنا بنصوم فيك ....يااااااااراجل .
ده انت شهر الكرم كله .
تعرف يا شيخ انك الشهر الوحيد اللي كلت فيه في بيتنا في أوقات محددة بقالي فترة .
نرجع للزبادي
أصل انا مبحبش حاجة تمنعني عن النوم لما تطلب معايا نوم .
قبل ما تنام ما تنساش تاكل الزبادي .
يااااااااااااااااااااااأم الجملة العتيقة.
قبل ما تنام ما تنساش تحط قطرة .
كل اللي باعوزه قبل ما انام ..إني أنام .
مش أي حاجة تانية .
بكره القطرة والزبادي .
ولو قالوا لي ما تنساش تقعد على الكمبيوتر شوية قبل ما تنام ..كان زماني كرهت الكمبيوتر .
اييييييييييه
معلش يا رمضان .. بس ما انكرش فرحتي اني مش مضطر آكل زبادي من دلوقتي لحاااااااااااااد ..الله أعلم .
إلى لقاء أيها الآتي والراحل .
لعلي في العام القادم ألقاك بقلبٍ أكثر هدوءا .