جيل الحزن والزهق

هكتب باللغة اللي بفكر بيها ، وباتكلم بيها مع نفسي يا اخواننا .
هكتب عني وعنك ..هكتب عننا .
عن جيل الضلمة وجو الخنقة ..جيل العصيان المكتوم ..جيل وصل انه بيتهم حتى نفسه بالسطحية وانعدام القضية ..
جيل غايب بلا إرادته عن تاريخ بلده ..

جيلنا .
تلاقي الشاب مننا حزنه صاخب ، وفرحه صاخب .
لما يحزن يسكت ..وده صخب الحزن في رأيي .
يسكت ويثير من حواليه قلق أهله واللي بيخافوا عليه ويهمهم أمره .
ونتسأل: مالك ؟
ونتأفف ..ما هو لو نعرف تتحل ازاي ..علينا النعمه كُنا اتعدلنا وفردنا خلقتنا .
حال البلد معووج ..حال أهلنا ميت .حال بختنا مايل .
لما ..(بقول لما).. يفرح .
يشغل مزيكا بصوت عالي ..يدخن بشراهة ..يضحك أوي ..ويفضل شابط في الضحكة لحاااااااااد ما يجيب آخرها ..لإنه مش عايزها تخلص ..أصلها لما بتخلص ..بتمرر الجوف .
جيلنا وحيد يا اخواننا ..تصدقوا رغم اننا جيل تقريبا سهل جدا كلنا يعرف بعضنا ..ونتواصل مع بعض آخر تواصل ..قشطة يعني ..موبايل وتليفون ونت وشات ومدونات ..ميه ميه .
بس ليه حاسس اننا كلنا وحيدين في وسط بعض ؟
وحيدين مع بعض .
غير مسموح لينا باليأس وكل حتة مننا بتئن بشيخوخة جاية على غير دعوة ..شيخوخة بنت جزمة.. جاية ليه دي ؟
بندوّر عن صفات كان المفروض تكون عندنا ..زي التفاؤل والمعافرة والإقدام .
كل اللي بنحاول نعمله ..بشتى الطرق ..إن احنا نعيش .
ان شالله نتنفس بربع رئة ..بس نعيش .
نفكر بتمن عقل ..عشان نعرف نعيش .
نحس ؟
لا ما نحسش ..ما هو لو حسينا كل اللي حوالينا والله لانموت .
كئيب أنا ؟
بالزق نفسي فيكو ..وانتو ناس زي الفل مثلا ؟
باتهمكم بالحزن - لاسمح الله - وانتو كلكم عالم مبسوطة وعاجبكم حالها ؟
بلاش .
هاسأل ..بالله اللي يجي يقرا الكلام ده ..يسأل و يجاوب نفسه .. لنفسه .
آخر مرة حلمت فيها كان إمتى ؟