اتجوزتها .. هه وبعدين ؟ .. خلاصة التجربة

طيب ، اتجوزتها ..

يمكن عشان كانت من أحلى البنات .

لا مش يمكن ،اتجوزتها عشان كانت أحلى البنات ..

البنات اللي كانوا في دايرتي ساعتها.

طب هه وبعدين ؟

دلوقتي هي بتكرهني عشان .. عشان مش شايفاني مدلدل لساني عليها كل ما اشوفها .

طب ازاي ؟

زمان كانت بتوحشني ، حاجة غريبة عني ..وكل يوم لوك و ميك آب جديد ..

لكن دلوقتي باستناها تخرج من الحمام عشان أدخل !

يا جماعة العيب مش فيها أبدا ، أنا اللي ملول أصلا ..

كمان هي مش من النوع اللي جمال بس ومن جوه طوبة .. لا هي كويسة حلاوة ومشاعر وكل الحوارات .

بس ..أنا ..

بلاش أنا ، حاول تحس بشعور عامل السينما وهو بيعرض فيلم جامد جدا ومكسّر الدنيا .

والفيلم فعلا تحفة ..تحفة ...تحفة .

واكمنه تحفه ، فالعرض مستمر ..مستمر ..مستمر ..

هيملّ الراجل ده ولا مش هيملّ ؟

هيتفرج عليه بشغف أول مرة ، وهيغيظ اصحابه ويقول لهم انه أول حد شافه فيهم ، وهيفضل يذلهم لحد ما يدخلوا يشوفوه ..

طبعا ما أقصدش أجيبهم يناموا مع مراتي ..

طيب تاني..

خلينا فيه ، خلينا فيا ، هيمل ولا لآ ؟

الفيلم ما نقصش حاجة هوَ هوَ زي ما هوَ نفس الإثارة والجمال ، بس التكرار

التكرار وحِش يا اخواننا ..

وبعدين لا ، ما الفيلم برضو ممكن تحصل له لسعة سجارة ، أو المكنة تعطل أعطالها (الدورية )..

طب الراجل بتاع السيما هيشوف الفيلم كام مرة ؟

مرة ..اتنين ..تلاتة ..وبعد كده ، شوية وهينقي كام منظر بيحب يشوفهم ..

وبعد كده ؟

هيسيب الفيلم شغال ويتلهي بأي حاجة ..

هو مش بيكره الفيلم .

الفيلم عاجبه ، بس ما ينكرش انه هيبقى يوم المُنى يوم ما يتشال وييجي فيلم جديد حتى لو أقل منه في كل حاجة ، ويمكن بعد سنتين تلاتة ، نفسه تهفّه على الفيلم القديم .

يقوم متفرج عليه مرة ..

مرة واحدة بس.

ده لو حنّ له أصلا ..

أصلكوا ما تعرفوش الملل بيعمل ايه .. ممكن يزهقنا من (أي) حاجة ..

هوف .

أعمل ايه طب ؟